Mul al jere non di persone, come che si pues dedusi di cualchi document medievâl di Glemone. Altris documents de stesse citadine a ripuartin formis che a varessin di jessi incressitivis: Mollon, Mullon, Mullion, Mulion... (Marchetti, 1934), e ancje Catarina la Muliona. Tal 1326 a Udin infra terram Stephani mul (Moro, 1991). La forme Mullón si le cjate a Gurize e a Cjopris e Viscon. Mulloni al è avonde presint a Cividât, massime te frazion di Sanguarç; achì al è documentât dal 1503, ma cuntune forme che e podarès lâ cuintri de spiegazion dade sore (Colau filius Simon Melon de S. Georgio). Lis atestazions dopo si riferissin, invezit, simpri a Mulon: 1515 Zuan de Mulon, 1520 Antonia Nicolai Muloni; 1540 Chulau filius de Zuan de Mulon; Bernardin di Mulon; Thoma de Mulon (Zuanella, Dom, 11, 1997). Al è presint ancje a Udin e a Cuar di Rosacis. A Mueç Disot Mulón al è il sorenon di cualchi famee Gallizia. Viodi ancje Mullig. Al è logjic pensâ che la origjin dal non, che al derive cun probabilitât di un stranon, si le rivi a spiegâ cun mul “mulo" par talian. La prove documentarie di chest nus e da De Stefani 2000: “Vuê al è sparît a Frêsis (comun di Enemonç), dulà che par secui al è stât in voghe il cognon Mulon / Mulloni. La prime atestazion e mostre, tal stes timp, il procès di cognominizazion. Ai 21 di Zenâr dal 1378 al ven fûr intun document scrit a Soclêf Brucnuto (?) dicto mul q. Jacobi ville de Freysis. Ai 8 di Novembar dal 1571 al è menzonât intune vachete notarîl, Antonio quondam Nicolao mulo de Frisis. Un Daniel mulono di Frêsis al è testemoni intun testament dai 13 di Avrîl dal 1582. Il non di famee al è ancjemò vîf sul finî dal '600 come che si viôt te regjistrazion, ai 16 di Fevrâr dal 1691, dal funerâl di Margarita filia q. Danilis Mulon de Friisis. In principi al jere un sorenon une vore slargjât in dut il Friûl. O cjatìn, par esempli, tal 1414 a Udin Leonardo dicto mulo cane, o pûr, tal 1515 Zuan de Mulon a Cividât. In ciertis zonis la vôs mul e je ancjemò vive. A Budoie si le dopre par dî di un "testart", di altris bandis, a Glemone e a Mueç, ma ancje a Enemonç, e indiche il "fantat". Ae base al è mul, "mulo" par talian, che si riferìs al animâl testart par ecelence. Ma il mul al è ancje l'animâl bastart, nassût incrosant un mus cuntune cjavale. Il concet di “bastart", po, si lu è doprât pai nocentins, pai frûts nassûts di une relazion che ni la societât ni la Glesie a permetevin. La cjase dai nocentins e jere clamade ospedâl dai mui. Di chest al è nassût ancje il tiermin ospedalìn, doprât par riferîsi propit ai fruts ilegjitims. In origjin, il sorenon al vignive dât a cui che nol vignive ricognossût dai gjenitôrs, fat no cussì râr par tancj secui. Cul timp, in cualchi zone, si è passâts di mul “frut no ricognossût" a mul “fantat". A Cividât al jere Mulla, ma no savìn se al sedi leât a Mulloni: 1495, ai 25 di Mai don Gaspare Mulla q. Dom. Mulla da Rualis Vicario in Caporiacco, teste in Cividale (AB); 1497, ai 12 di Zenâr Pasqualino e Franc. q. Leon. Mulla da Rualis in causa con m.° Pantaleone sarto di b.° Ponte (ANU 729); 1514, ai 6 di Zenâr Pasqualino Mulla q. Leon. da Rualis testa – Sepoltura nel cimitero S. Stefano di Gagliano con 8 preti e 4 doppieri (ANU 727). Compagn par Mullo: 1436 Paolo di Nicolò q. Odorico Fradon da Grupignano sposa Pascolina q. Giac. di Simone Mullo di Grupignano (ANU 712).